विविध मागण्यासाठी अखिल भारतीय ऊस उत्पादक शेतकरी समितीचा रास्ता रोको
पाथरी(प्रतीनीधी)पाथरी तालुक्यासह जिल्ह्यातील ऊस उत्पादक शेतकर्यांच्या विविध प्रलंबित मागण्यांसंदर्भात अखिल भारतीय किसान व स्वाभिमानी शेतकरी संघटना यांच्या नेतृत्वाखाली शनिवारी (दि.29) पाथरीत रास्ता रोको आंदोलन करण्यात आले. यावेळी ऊस उत्पादक शेतकर्यांच्या मागण्याला रेणुका शुगर साखर कारखाना कडून प्रतिसाद देण्यात आला असून 2 हजार 962 रुपये पहिली उचल त्यांनी जाहीर केली आहे.
राष्ट्रीय महामार्ग 61 वरील पोखर्णी टी फाटा येथे शनिवारी सकाळी 11.45 ते दुपारी 2.30 वाजेपर्यंत झालेल्या या आंदोलनात तालुक्यासह जिल्ह्यातील विविध शेतकरी संघटनांचे नेते, माजलगाव तालुक्यातील आंदोलनकर्ते तसेच सांगली जिल्ह्यातून आलेले शेतकरी नेते सहभागी झाले होते. आंदोलना दरम्यान पोलीस निरीक्षक लक्ष्मण केंद्रे यांच्या नेतृत्वात मोठा पोलीस बंदोबस्त ठेवण्यात आला होता. महामार्गाच्या दोन्ही बाजूंना वाहनांच्या लांबच लांब रांगा लागल्याने वाहतूक पूर्णपणे ठप्प झाली होती. महसूल व पोलीस प्रशासनाने परिस्थिती नियंत्रणात ठेवत कारखाना प्रतिनिधींशी संपर्क साधला. रेणुका साखर कारखान्याचे प्रशासनातील कर्मचारी यांनी ऊस दर संदर्भात लेखी स्वरूपात पत्र दिल्यानंतर आंदोलकांनी वाहनांसाठी रस्ता मोकळा करून दिला.
आंदोलनादरम्यान करण्यात आलेल्या भाषणांमध्ये, जिल्ह्यातील अनेक कारखान्यांनी रेणुका शुगरवर ऊसदर वाढीच्या निर्णयासाठी दबाव टाकत असल्याचा आरोप शेतकरी नेत्यांनी केला. रेणुका शुगरकडून प्रतिटन सुमारे 3 हजारांच्या घरात दर जाहीर होणार असल्याची चर्चा खरी ठरल्याने कारखान्यांकडेही 3 इतर शेतकर्यांच्या अपेक्षांचे लक्ष वेधले गेले आहे. ऊस उत्पादक शेतकर्यांच्या मागण्यांबाबत इतरही कारखान्याकडून मागील थकीत हप्ते व उत्तर भाव वाढ जाहीर होईपर्यंत संघर्ष करण्याचा इशारा आंदोलकांनी दिला आहे.
रेणुका शुगर्सचा २ हजार ९६२ रुपये प्रति मे. टन ऊस दर जाहीर
पाथरी तालुक्यातील देवनांद्रा येथील श्री रेणुका शुगर्स लिमिटेड साखर कारखान्याने यंदाच्या २०२५ – २६ ऊस हंगामासाठी २ हजार ९६२ रुपये प्रति मेट्रीक टन एवढा ऊस दर शनिवारी(दि. २९)जाहीर केला आहे.ऊस दर जाहीर करण्यासाठी स्वाभिमानी शेतकरी संघटना, अखिल भारतीय किसान सभेने कारखान्याकडे मागणी केली होती. स्वाभिमानी शेतकरी संघटने सोबत झालेल्या प्रत्यक्ष चर्चानंतर श्री रेणुका शुगर कारखान्याने ऊस दर जाहीर केला आहे.